ZEURE ESKU

Autolaguntzarako gida moduan funtzionatzen zuen programa zen Zeure esku. Klaudio Landa zen aurkezlea, eta gizarteko arazoei aurre egiteko aholkuak ematen zituzten.

Herritarrak kezkatzen dituzten hainbat arazo jorratzen zituzten programan: erretzeari utzi, norbere burua maitatzen ikasi, estresari aurre egin, haur jaio berri bat zaindu, lana aurkitu, azterketak ondo prestatzen ikasi, bikotea bilatu... Buruhausteak diruditen egoera horietan nola jokatu behar den erakusten zuten. 

Atal bakoitzean kasu erreal bat erakusten zuen Klaudio Landak. Protagonistaren arazoa ezagutarazi ondoren, adituengana jotzen zuten nola aurre egin jakiteko. Adituen artean medikuak, dietistak, psikologoak, ekonomialariak eta abar egon ziren. Horiek zenbait eredu ezartzen zituzten nahi zen helburua betetzeko.

Bestetik, Zeure esku saioa interaktiboa zen. Ikus-entzuleek entretenitzeko aukera izateaz gain, ikasteko aukera zeukaten. Hartara, esku liburu baten formatua zuen programak, informazio osatua eskaini ahal izateko. Grafikoen bitartez, arazoaren puntu garrantzitsuenak nabarmentzen zituzten, eta adituek ezarritako metodoa pausoz pauso zehazten zuten.